Տասնհինգ տարի առաջ Հնդկաստանում ավոկադոյի շուկա գրեթե չկար։ Ավոկադոյի արտադրությամբ զբաղվող ու 26 տարի այդ ոլորտում գործունեություն ծավալող գյուղատնտես Սունիլ Բոպայան BBC-ին պատմել է, որ տարիներ առաջ հասած ավոկադոները ծառերից թափվում էին, դրանք ճաշակում էին շները։ Հենց այդ պատճառով ավոկադոն ստացել է «շան միրգ» անվանումը։
Ներկայում Սունիլ Բոպայան Cottanad Plantations-ի խմբի ղեկավարն է, որը Հնդկաստանի հարավային Կերալա նահանգում աճեցնում է նաև կակաո, կաուչուկ, սուրճ, համեմունքներ և մրգեր։
«Մենք երբեք ավոկադոն չենք տնկել որպես մեր հիմնական մշակաբույս։ Մենք այն ներմուծել ենք որպես ստվերային ծառ՝ սուրճի տնկարկների համար և միայն ավելի ուշ հասկացանք, որ այն կարող է դառնալ շահութաբեր բիզնես», — ասել է գյուղատնտեսը։
Նրա խոսքով, մրգի կյանքում շրջադարձային պահը մոտավորապես 2011 թվականն էր, երբ Բոլիվուդի աստղ Շիլպա Շետտին հայտարարել է, որ ավոկադոն օգտագործում է մաշկի խնամքի համար: Մեկ գիշերվա ընթացքում ավոկադոյի գինը կրկնապատկվեց, ապա շարունակեց բարձրանալ։
«Մենք ամբողջությամբ փոխեցինք ավոկադոյի աճեցման եղանակը՝ սովորելով հարավաֆրիկացի մասնագետներից։ Այսօր մենք օգտագործում ենք ավելի լայն տարածություններ և տնկման տարբեր մեթոդներ, քանի որ ավոկադոյի արմատները խիստ խոցելի են հիվանդությունների նկատմամբ»,-ասել է Բոպայան։
Հնդիկ ֆերմերների համար կա մեծ հնարավորություն արտադրությունը մեծացնելու համար։
Մանիլալ Պալիաթը, ով նպաստում է Հնդկաստանում ավոկադոյի արդյունաբերության զարգացմանը, նշել է, որ Հնդկաստանը տարեկան ներմուծում է 15. 000 տոննա ավոկադո, իսկ տեղում աճեցնում 8000-9000 տոննա։ Թեև Հնդկաստանում պահանջարկն աճում է, սակայն միշտ չէ, որ տեղում աճեցված ավոկադոները լավ են վաճառվում։
