Պետական եկամուտների կոմիտեն ՊԵԿ ուսումնական կենտրոնի հետ համատեղ սեպտեմբերին 16-ին մասնակցել է Հայաստանի պետական տնտեսագիտական համալսարանում անցկացված աշխատանքի տոնավաճառին, որին մասնակցել է ավելի քան 70 գործատու։
Կոմիտեի և ՊԵԿ ուսումնական կենտրոնի ներկայացուցիչներն ուսանողներին և երիտասարդ մասնագետներին ներկայացրել են պետական համակարգում աշխատանքի առանձնահատկությունները, ՊԵԿ-ի կառուցվածքը, գործառույթներն ու գործունեության հիմնական ուղղությունները։ Ուսանողները հնարավորություն են ունեցել տեղում ծանոթանալու Կոմիտեում առկա թափուր հաստիքներին, դրանց համալրմանն ուղղված քայլերին, այդ թվում՝ հարկային և մաքսային ծառայություններում աշխատանքի ընդունման հնարավորություններին։ Երիտասարդ մասնագետներին ներկայացվել է նաև հարկային և մաքսային ծառայողների պատրաստմանն ուղղված ՊԵԿ ուսումնական կենտրոնի կողմից կազմակերպվող անվճար դասընթացների մանրամասներն ու դասընթացներին մասնակցելու ընթացակարգերը։
ՀՀ ՊԵԿ անձնակազմի կառավարման վարչության պետ Լիլիթ Թովմասյանի խոսքով՝ Պետական եկամուտների կոմիտեն կարևորում է ուսանողների և երիտասարդ մասնագետների հետ համագործակցությունը՝ հնարավորություն տալով նրանց գործնականում կիրառել ստացած գիտելիքները, ծանոթանալ պետական համակարգում աշխատանքի առանձնահատկություններին և նրբություններին՝ նպաստել վերջիններիս մասնագիտական հստակ կողմնորոշմանն ու մասնագիտական աճի ձևավորմանը։ «Առաջնորդվելով ՊԵԿ-ի տեսլականով և առաքելությամբ՝ մեր նպատակն է ոչ միայն աջակցել երիտասարդներին մասնագիտական կայացման գործում, այլև հետագայում նրանց հնարավորություն տալ որպես գործընկերներ ներգրավվելու Պետական եկամուտների կոմիտեի թիմում», — ընդգծել է Լ․ Թովմասյանը։
Հիշեցնենք, որ ՊԵԿ-ը վերջին տարիներին ընդգրկվել է Հայաստանի առավել գրավիչ գործատուների առաջատար տասնյակում՝ 2024 թվականին զբաղեցնելով 5-րդ, իսկ 2025 թվականին՝ 6-րդ հորիզոնականը։ Հարցման շրջանակում ուսանողները կարևորել են մասնագիտական աճի հնարավորություններն, աշխատավայրի հարմարավետ պայմանների առկայությունը, գործատուների գրավչությունը, թիմային մշակույթը և այլն։
Կարևորելով բուհ — աշխատաշուկա և ուսանող — գործատու փոխադարձ կապերի ամրապնդումն ու զարգացումը՝ ՀՀ բարձրագույն ուսումնական հաստատությունների հետ շարունակական համագործակցությունն ու երիտասարդ մասնագետների համակարգում ներգրավումը Կոմիտեի առաջնահերթ ուղղություններից են։
