Ռումինիայի Չերնավոդայի միակ ատոմակայանը հոկտեմբերին չի սկսի իր աշխատանքը, քանի որ Դանուբ գետի ջրի մակարդակը դեռևս բավարար չէ էներգաբլոկների վերագործարկման համար։
«ՏԱՍՍ» լրատվական գործակալության փոխանցմամբ՝ այս մասին հաղորդում է Ռումինիայի Կառավարության մամուլի ծառայությունը։
«Երկրի մուտքի մոտ Դանուբի ջրի մակարդակի կանխատեսումները չեն երաշխավորում հոկտեմբերին Չերնավոդայի ատոմակայանի նույնիսկ մեկ էներգաբլոկի անվտանգ աշխատանքի վերսկսումը»,- ասված է հայտարարության մեջ։
Ավելի վաղ Ռումինիայի Էներգետիկայի նախարարության պետքարտուղար Քրիստիան Բուսոյը խոստովանել էր, որ բարենպաստ եղանակային պայմանների դեպքում էլեկտրակայանի աշխատանքը հնարավոր է վերսկսվի հոկտեմբերի կեսերին։
Դանուբ գետի ցածր մակարդակի պատճառով Չերնավոդայում գտնվող ռումինական ատոմակայանի երկու ռեակտորների աշխատանքը դադարեցվել էր։ Սա երկրի միակ ատոմակայանն է և արտադրում է Ռումինիայի էլեկտրաէներգիայի մոտ 20%-ը։
Երաշտի պատճառով Ռումինիայի Կառավարությունը մի շարք էներգախնայողության միջոցառումներ է իրականացրել ընկերությունների, տնային տնտեսությունների համար։
Ռումինիայի էներգետիկայի նախարարությունը նշել է, որ ատոմակայանի փակման պատճառով Ռումինիայի էներգետիկ համակարգը գործում է իր հնարավորության չափով։ Գազով աշխատող էլեկտրակայանների և վերականգնվող էներգիայի աղբյուրների արտադրական հզորությունը բավարար չէ ներքին կարիքները բավարարելու համար, ուստի դեֆիցիտը պետք է ծածկվի ներմուծման հաշվին։
